Ang buwan sa adlaw sa iyang gugma (ika-upat nga hut-ong)

nag-abot ang buwan ug ang adlaw
sa kabugason

Ang buwan sa adlaw sa iyang gugma (ikatulong hut-ong)

Gibanlas sa ulan ang panganod,
nahulog ang kaparat sa pag-antos
sa dagtom nga ali sa dughan sa buwan.

Mitin-aw pagbalik ang langit
nihayag ang palibot
nanaghoy ang gangis.

Nawala ang kapungot
sa nagbangurong langit,
tam-is ang pahiyom
nga iyang gibatonan.

Ang buwan sa adlaw sa iyang gugma (ikaduhang hut-ong)

Ikaduhang pagsubang
milingiw silang tanan
nahanaw ang sinag
tinakpan ang iyang dughan
sa dagtom
sa kapalaran.

Nabasa ang yuta
nilakra ang tunob sa kadalanan
bugnaw ang huyuhoy sa kapalaran
makabungol ang kagabhion
nagtago luyo sa bagang panganod
ang masulob-ong buwan
sa wala pagpatim-aw
sa mga bituon
sa kalangitan.

Ang buwan sa adlaw sa iyang gugma (unang hut-ong)

Andam na ang buwan
mihulma sa iyang lawas
ang gagilak gilak niining pulang bistida
nga niamag sa kagabhion

niduyog niya ang sonata sa kagabhion
nitaghoy ang hangin
sa iyang matahom nga pahiyom
ug nagidhat ang mga bituon
nga kaniya mialirong

dili malimod

gihubo ko na kadtong akong puti nga bistida
naglilong ako ug sa akong pagtago nahibagat ko ikaw
nga usa ka hunyango nga miubay sa kolor
sa lubasong tugas nga kanunay nakong gipasilongan
apan dili mahimong masayop ako
igsuon kamo sa tabili ug sa halo

dinhi ilalom sa kaudtuhon sa akong paghikalimot kanimo

naghinga hinga na usab kining panumduman
nahinumduman ang kanhi pagkabusog
sa imong mga tam-is nga mga halok

dili matukib ang kahibulong
bisan dinhi ilalom sa kaudtuhon
nagpalandog, nag-aninaw
niadtong mga damgong dili malaknit
sa pobre kong panumduman.

ang napalong nga siga

walay tihik tihik kang miapula
niadtong kalayo nga nagsiga.

tataw kaayo ang imong kaligot-got
lulan sa imong siga kaayo nga mga mata.

unsa ba gyud diay ang sala niya
nga miulbo man gyud
ang imong kasuko ug kayugot?

wala man tingali siyay gihimong dautan
gawas sa pagpadilaab sa iyang kahayag
ngadto sa uban
ug pagpainit sa iyang siga
ngadto sa gipanugnaw nga kamingaw?

apan bisan pa sa imong kasayuran
daw sa dawo kang paglaom,

nga nagmakusganong mipospos sa siga
haron dayon kini mapalong.

apan ingnon tika
nga ang baga niini
dili madala sa imong pagtayhop
kay mudilaab ug mudilaab gayod kini.

iya na kini ug dili lilong iya kini hangtod sa hangtod.

pinitik sa pagpakigbisog

nabati ko na ang imong mga sinyalis
kagahapon misuka ako pagsugod
sa kaaslom sa imong gugma
ug nalipong sa kapaet
sa akong nahimutangan

dili lisod sabton,
aduna ako'y kaminyuon
sayod ka niana
kay tataw usab
nga aduna nay kasayuran ang pipila

malipayon ang imong amahan,
ug sa wala'y pupanuko ikaw gidawat niya

alas 11 sa kagabhion, kagahapon
unang higayong nabati ko ang pinitik
sa imong pagpakigbisog
timan-e lang wala ka mag-inusara
kauban mo ako
kay ikaw akong hinigugma.

ang akong balak karong adlawa

gimingaw na pag-usab kining akong balak
sa mga linya sa letra ug pulong
nga daw bulawan nga nahipatik sa akong dughan

abi nakog nahikalimtan mo na ako usab
abi ko'g nilabay na kadtong katapusan
sa atong pakighinabi

apan sayop ang tanan
kinahanglan kining ibalak pag-usab
ug ipahayag sa kadaghanan nga hubo
ug wala'y bakak

Dili mahimong higugmaon

Unsay ako
sa mga pasumbingayng
imong napupo sa agianan
nga imong gilaktan
kagahapon ug karon.

Unsay ako'g
nahimo kanang tahor
sa imong sapatos
nga panit ug mahalon.

Wala man pud tingale.

Kay gawas nga ikaw
ang akong gikinahanglan,
wala ako mahigugma sa kalibutan
ug dili ako mahimong mahigugma niini.

panit nga dili makabati

gipang-it, gidagit, gibit-bit sa iro
ang panit sa linapa nga kabaw
nga nakigbugno sa iyang amo
kaganihang hapon

ang kabaw nga naghilom,
nagpaanod sa sulog
sa sugo sa iyang among madaug-daugon

pagkawalay pulos sa iyang pagkahari
pagkawalay pulos sa iyang pagkamaakuhon
pagkawalay kwenta sa iyang mga sugo
kung siya mismo dili niini makahimo

maayo pa ang panit
dili niini mabati ang kapaet
sa pagwisi wisi niini
sa irong wala usa'y kalibutan sa panghitabo

ang ugma ang laing kinabuhi

nganong mabalaka kita anang ugma?
nganong mamuhunan paghipos anang kaugmaon?

karon ang kinabuhi
ug ugma ang laing kinabuhi

buhaton ang karon
kataw-an ang karon

kay ang ugma na ang atong pasulbaron
sa iyang kaugmaon

ubani ako

gusto nakong ubanan ikaw
sa pagdimdim sa katam-is sa kinabuhi
sa pagtuki sa mataggutlo sa atong pagbati
ug lili sa balililhan sa aping nga luhaan
nga may igong kaaslom ug kaparat
nga iya sa kina-iyahan

naanad na ako nga uban ikaw
ug mahamulingwan ako
kung mahanaw ang imong panglantaw
maong ayaw pagbiya
hinunua ubani ako ning akong
pagdimdim sa matagtakna

gilaayng kabuntagon

landong ang panahon
daw sa walay buot ang adlaw
sa pagsubang dinhi sa akong langit

baga na usab ang panganod
nga nitabil sa asul nga silangan
nagmalinawon ang mga langgam
wala kini muawit ning kabuntagon

gilaay usab kini sama sa katri
nga nihay-ad
ug nitanday sa habol nga wala pa napilo
nga na-unlan sa banig nga wala pa nahipos

naupos na ang akong pailob
ako na ang mangabli sa bintana
ug mang hawan sa hawanan

tingale unya sa kaudtuhon
sugaton ako sa katawa sa akong paglaom.

ang imong kasing kasing

pinili ang mga lugas sa humay
haron kini ipigugas ug itanom

sama nga pinili sa dughan
ang pulong nga iyang patuhupon

dili ko nalang ikaw sangpiton
dili ko nalang ikaw pangitaon

nasayod kong may kasayuran kana
nga ako wala mahaom dinha
sa imong kasing kasing
nga karon aduna nay anihunon

ang pagsubang sa bulan

wala koy buot tampukon
sa akong mga pulong

mugna ko lang kini
ug dili angayan nga imong seryusuhon

nasayod ka na siguro
ug nganong nagpakahilom ako,

nagpakabuta
ug nagpakawala mahibalo

kana tungod kay
gusto na usab akong mahisama

sa bulan nga himatayon
wala mudan-ag sa imong langit

ug wala muuban sa imong mga bituon
wala mugakos sa imong kagabhion

apan tingale sayod ka
nga tawag lang kini sa panahon
normal lang kini nga sitwasyon
ug dili kini makanunayon

ang sulat ug ang lakra sa gisulatan

giukab ko pagbalik kadtong mga gihay
sa akong karaang notebook
kung hain nahasulat ang imong
mga dinumerong pangaliya
sa akong pagbalik sa imong tiilan
haron muhalok kanimo
pag-usab ug ibayaw ka sa imong
kalibutan

apan hanap na ang tinta
dili ko na maklaro
dili na usab buhi kadtong mga lakra
sa imong kusog sa pagduot
sa ballpen mong panda
nga itom ug agi

tingale angayan na gyong kalimtan
andam na ako sa akong pagdawat sa tanan.

igo na

mialisngaw na usab
ang imong pan-os nga panglantaw
daw gihay sa mga walay puamod
nga unas nga gasigig kagaskas
panahon sa akong pagpahulay

kalimti na kanang imong mga sugilanon
pasalay-lua ang imong kagutom
palabya ang imong pagkahakog
hununga ang sonata sa kaibog mo
sa buhok sa bulan nga bulawan

wala na kini'y bili
buta na ako,
bungol,
ug binhod na ang akong mga unod
sa akong pagpamati kanimo.

nangalaya

unsaon pa ba pagtakdo
ang napusgay nga kalipay?

unsaon paghulip ang nahulpa nga gugma?

ug asa pa mudangop haron maalim
ang katapusang iyagak

sa usa ka asawa nga
nilugapak sa yuta ug nahubsan

sa mga luha haron
pagbuhi niadtong
pag-agwanta nga nangalaya

kalipay ko ang kahilom

binulig nga kalipay
nga ania ginapos sa akong luha
ayaw na ako ambata sa pagkakaron
kay ingnon ko ikaw
nga mas gusto nako ang magpakahilom
mas gusto kong dili una ikaw matandog
sa imong pagkahinanok diha sa iyang kiliran
nitaob na usab ang dagat
ug midan-ag ang bulan
apan mas maayo nalang tingale
ang dili maghumol sa tubig
ug magpaanod nianang kalipay
sa sunata sa mga balod