magpabiling buhi

wala gikinahanglang ang hubad

ang walay tupong nga kasakit

mulutaw sa walay hunong nga pagtubod sa luha

matapos ang tawo, malumpag ang bukid nga bato,

mahugno ang matagmugna

mahanaw daw sa abo

katuhuan dili

ang gugma magpabiling buhi

dili mahimong mag-uwan sa kanunay

dili mahimong mag-uwan sa kanunay

niabot ang kamingaw ko kanimo

nibalik sa panumduman ang imong awit

ang makabungol nga singgit sa imong gitara

dili ako mahimong masayop

dili na mahubo ang garay sa pulong nga nakulit

sa akong kasing kasing

ang gasadyang buwan

hagip-ot nga dalan,

daw dili maagian sa kangiob

danglog sa siyam na kaadlaw

nga pagbunok sa ulan

dili malilong ang pagsadya

sa lingin nga buwan

Si Mama Ondet

52 anyos pa lang siya

apan nalubos puti na ang iyang buhok sa uban

sunog na ang kunot niyang panit

ug nagkiang na sa sakit sa iyang tuhod

si Mama Ondet--ang akong inahan; nagpailawom

wala baliha ang kapaet sa pagpakabuhi ning kalibutan

gitaak ang pilapilan sa Looc ilawon sa init ug ulan

gisulong ang hunasan bisan sa katugnaw sa kaadlawon

nagpakahilom, nagpailob bisan sa bul-og sa kawad-on

apan unsaon ko man siya pagbayad?

unsaon ko man paglukat kanang utang kabubut-on?

nga nakalinya na sa iyang agtang ug nawong

unsaon ko paghulip ang kahago?

nga nahulma na sa ugat sa iyang mga kamot ug bukton

palaran sila nga nahimo niyang anak

ug bulahan siya nga mapahiyumong inahan

bitbit kanunay ang gugma ug paglaom

pagtulon-an nga walay katapusan...

ug ako mapasalamaton

nga siya ang akong ugangan

Parat parat nga kape

Maayo pang tasa sa akong kape

gitungab ning tugnaw nga kagabhion

apan ang bulak sa antuwanga

gitalikdan sa buyog

nga anaa sa lawom niyang katulugon

Naluoy kong gatan-aw

ug sa akong pagpaantaw

nitulo akong luha

natagaktak sa tasa nga akong gitungab

nga karon parat parat na

lami man sad diay

lingi sa paglaum

binug-ok nga singot
nidaligdig sa gabahirig kong pangandoy

nitikig akong liog sa pagnilingi
galaum nga ikaw makab-ot

amag ang mga tinaguan apan dili ang gugma

anaa ang kaanyag sa gitago
ang puti nga ilok, ang hawak sa liog
hamis ug makahubog bisan wala'y bahalinang
gilad-ok, gibahog, karon gisid-ok
kay nakita ang amag nimong gitago

apan ang gugma nga tinaguan
lagmit kanang mabaho
mag-alintabo maong mangitag guho
dili gustong mabuot
mulagom, mamatay, ug mahimong maghikog

ang imong luna

nindot kining imong luna
maayong magpalando'g panagsa
labi na sa init nga kaudtuhon
maghumol sa tunaan
magsalum-salom
maminaw sa tinagaktak
sa letra sa imong mga pulong

ang akong gugma

baog ang akong gugma
nag-inusara, dili manganak
dili makapangala
gaagwanta sa pagtagik
ning pulong sa huna huna

katulugon

malisod kining ana ka sa katulugon
daw matagak ang imong hunahuna
mawala ang imong gugma sa pagkaon
mag-alidasay ka ug wala kay tagdon
bisan pa ang garay sa mga pulong