Nagdilaab nga Kalagot

Napungot ka ba?

Nganong wala mo ako panumbalingag 

Mipadayon ka pagpadilaab anang imong kalagot

Apan kung kalipay nimo

Hala dabdabi ako

Haron maugdaw ug maabo

Nagabok nga pagsalig

Nagabok ug nalata na ang gikapoy kung pagsalig
daw nahubog sa tumang pagbiaybiay sa mga balas
nga wala muhunong pagyatak sa akong katungod
ulahi na haron mahiuli kini sa kanhing bulig

Landong sa Kangitngit

Luyo nianang nasalop nga adlaw
ang gasadyang landong ug kangitngit
hagit sa langit ang dyutayng kamingaw
panganud nidugang sa kahait sa iyang syagit

nanaghalok tang mga landong

managsama kitang nangandoy
nag-uban kita aron tumanon ang mga saad

dili ba igo nga duha kita sa dugayng panahon?

karon usa kita
sa usa ka pulgadang gilay-on

samtang nanaghalok ang atong mga landong

damgo

Usahay and imong mga damgo
mahulog sa imong mga kamot
mahanaw daw abo
ug mulupad daw pulbos sa kalimot

buot kang manamilit
buot kang muhawid
apan daw usa ka lotto
nga malisod daugon

kaparutan

gipatay mo ang akong kasing kasing

gihiluan mong akong huna huna

tan-awa malipayon ka na ba?

igo nabang sud-ungon

ang kaparutan

nga ako karong nahiaguman?

sukli

sukli ba sa akong gugma

ang pagtakwil mo kanako

matagkaron ug unya?

manghinaot akong

imong makita

ang nipis nga kutay

sa akong gugma

nga imong gibaliwala

Atabay

kalawom sa kamingaw

kangitngit sa dalan

paingon sa atabay nga nahubsan

haron imong kalusan pag-usab

Babayeng buang

buang ang babaye

nga magpabilin niining lugara

puno sa kamingaw

abunda sa kawad-on

talamak ang pag-antos

nagbaha ang luha

gawas nalang kung siya nahigugma

haron mahimong rason

ang pagpabilin

taliwala sa empernong

wala niya gidamgo

Paglaum

Paglaum ka ba nga niabot sa tungang gabie

kung hain nahinanok na ang tanan?

Wala ko na ikaw panganduya pa.

Gikahadlukan kong ikahibalag ka pag-utro.

sala man ikaw

sala man ikaw

wala ako mahadlok

andam akong ibugti ang akong kinabuhi

tungod ikaw lang ang nag-inunsara kong gugma

ug wala nay laing damgo pa

bisan alang nila gadaman lang ako

buhion pagbalik

gibuhi mo pagbalik

ang namatayng gugma

ang pulong nga buot ko nang kalimtan

ang mga balak nga ako nang nalubong

ang mga adlaw ug gabii nga buot kong isulat

ang garay sa mga pulong nga imong giawit

namublakik ug karon dili mahimong

pasayluon ko ang kagabhion

nga dili ko ikaw buhion pagbalik

wala ako makalimot

ingnon ko ikaw nga wala ako makalimot kanimo

ug sayod akong wala usab ikaw makalimot pagduaw kanako

bisan gani sa mga panahong wala ako

tam-is ang nangagi

ang mga lalik sa imong mga pulong

daw langit ug daw bugnaw nga huyuhoy sa hangin

napadpad ako

sa lugar nga wala ako masayod ug maka-ila

gawas nalang sa tingog nimong dulot lalum

sa akong panumduman.

anugon

nitig-a na usab ang kanhiay maanyag nga harden

wala na natalinghan pagguna; paghabok

haron muhumok pagbalik ang yuta

ug mahimong mabulakon ang tanaman

nga kanhi imong gibalik balikan

Kaanugon~

kinilong kalamay

hain na ang hulagway sa pag-inunungay

tam-is lang gyud diay and tubo

sa mga unang pang-os

apan sakit sa apapangig

sa kadugay nimong laknit sa unod ug panit nga hunit

maayo nalang ang kinilong kalamay

andam magpabiling tam-is

hangtod kanus-a nimo maantos

ang pagbayad sa traynta e utso niini

nga matagkilo