Sayop ba DIAY

nganong sayop nga higugmaon ka
nganong ikaw langit ug ako yuta
samtang ako kagabhion ikaw adlaw
malisod litukon apan ingnon ko ikaw
ang akong gugma ug gibati
alang lang kanimo bisan
ang imo dili maako
kay giangkon na kini sa uban
sayop ba diay
dili ba pweding angay
ikaw, ako ug siya
bahin bisan dyutay
ako kining ikalipay

Didto Unya sa akong Damgo

Asana to ka?
Abi ba nako ug gakuyog tang duha
Dinhi niining hawod nga kabuntagon

Gadag-om sa Luyang
Muulan tingali ni karon
Kaanindot na gyud ihuyatid

Didto tupad sa among iring nga kabang
Laagan gasigi lang ug bulong sa iyang kundatang amiga
Kaayo gyung panitan sa kasabaan

Unya didto sa akong higdaan
Ikaw akong hawiran ug hawiri ko
Tingalig maanod ko sa akong mga damgo

Nalingaw sa Bilyakong Komedyante

gikutasan kog katawa
sa mga gitik mong pulong
didto sa akong mga dawnggan
ug kasing kasing nihunghong
daw mga komedyante sa circo bilyako
walay kausaban, katapusan
dili mahagit sa balak sa hangin
dayon tamparos sa iyang gaunos nga garay
taympa una Manoy
nakalimot kong naa pa diay koy linung ag sa dapugan
nanimaho nang sunog
tingalig dili na unya to nimo makaon

Pailob

matuod nga kagahapon pakong paabot
sa wala maabot nga paglaom
pero ang tinuod,
naluoy kong naglantaw nimo dinhi sa baybayon
nga niaging tuig pa gaatang anang imong pingwit
nga lima ka pangan lang ang kuha
gibatyag kog kaduka, gatanga
para nako ikaw na ang hari sa kamapailubon

Pingwit

Ayaw saligi kanang imong kagwapo
Ayaw ilabay kanang imong mga pulong
Urog urog kanakong masaligon

Lahi kadtong sa una nga lingin pa ang bulan
Hayag ang dalan ug daghan pang alindanaw
Sa sapa nga kanhi natong pagabaklayan

Karon bungol nako sa imong sangpit kang Iyay
Nga nagpaatbang permi gahuwat sa paglabyog
Sa imong pingwit nga balat ang paon

Alang kang Manong

kahait sa imong tan-aw kanako
daw sa kaonon mo nga walay panit panit
kitkiton nga daw sa walay bukog
tupsan sa katam-is daw tubo
apan ingnon ko ikaw nga pahawa na
ayaw kog tintala
kay tingali ug mahinayak ko
makalimot ug dalhon tika sa akong kwarto
ug didto tika ilansang sa akong bungbong
uban kang Piolo, JC ug Zeus

Tulo ka Bakak

Gikutasan nako
Sa imong pagbalik balik sa pansayan
Dili lang sa makaduha, tulo, upat, lima,
Ka higayon tikang nasakpan
Naaktuhang niago, niutnga ug niutong
Nalibang nga walay hugaw
Nihagawhaw ka ug miingon,
"Gitubol ko"  
Apan nasayod ko
Bakak lang ang tanan
Una, kay gainom kag tsa padaot
Duha, kay utan ang gikaon mo ganiha
Tulo, kay nasayod kong gahinay kag lantaw
Luyo sa pultahan
Sa paa ni Roxanne nga gakupot sa Tanduay
Sakay sa kabayo
Sul-ob ang two-piece niyang pula
Animal ka!
Bakakon kang dako

Upos nga Pailob

Niuwan, nauwanan, nagpasinguwan,
Nabasa, maayo pag maligo nalang
Puslan mang nahumod, naumod,
Dawaton ang tanang pagdaugdaog
Apan ayaw kalimting makabarog pa ko
Ug sa akong pagbarog ipanaad ko
Hubuan ko ikaw sa imong kabakakon
Panitan sa imong kabigaon
Tan-awon ta ug duna pay mahabiling nawong
Nga iharong kanako ug sa upos kong pailob

Happy Ending

Sa matag human sa usa ka yugto
Musunod ang usa nga mahimong musalo
Sa imong pagkatagak

Ug dili tanang katapusan kagul-anan
Usahay usa kini ka lutsanan padulong
Sa pagkakaplag sa imong kagawasan

Wala ko na igsapayan ang sakit sa kamatuoran
Sakto na ang hilak, bakho ug luha
Kay mahimong mukatawa bisan unya sa imong pagbiya

Kamatuoran

Matuod walay pailob ang hangin
Ug bisan pa sa kasalbahis ug kabangis sa bagyo
Wala ako malisang nga mulatas niadtong hataas ug habog
Nga bukid sa atong kagawasan, antuson ko

Kay sama sa bulkan, nag-umido kining gibati
Sa akong kahiladman; nagbaga kining gugma
Ug andam na mupadagayday unya diha sa aping
Nga wala maghusga ug mutulisok sa kamatuoran

Bangunon kadtong mga damgo nga gitisok
Sa walog nga naanod sa tampalasang bul-og sa baha
Andam na ako, mubarog bisan pa sa kaulaw
Tapuson ang nasugdan ug dawaton ang kamatuoran

Kagawasan

Dili ko ikaw pugson pagkuyog kanako
didto sa lugar unya nga mahimong atong salag
sa pangandoy, gugma, kahingawa, kalipay ug kaulag
nga bisan pa sa gihambin tang pagbati
wala kini nato mapatuman human sa sudya sa panahon
ug sa kumpisal nga ikaw ug ako hiniktan ug walay kagawasan

Dili ko ikaw hangyoon nga mulampanog uban kanako
karong kadlawon sa dili pa magmata ang adlaw
ug magpakita sa iyang kaisog haron iulipon kita usab
diha sa atong kaulaw, kalimtan ko kining tanan
wala ako mahadlok nga mabali ang akong tuong pako
maputol ang akong walang tiil ug mabuta ang akong mga mata
sa sudya unya sa mga alibangbang ug pati

Dili ko igsapayan ang tanan
Ikaw lang ang magbuot, ikaw lang ang may katarungan
Apan sublion ko, naa ra nimo ang imo ug ako unyang kagawasan.

Abutanan

Gikan karon, atangi ako
Didto sa atong kanhi abutanan
Kay isugilon ko kanimo
Ang tanan nga akong tinaguan
Gikan sa bati, ngadto sa pinakabati
Iyagyag ko ang akong tanang gibati
Ayaw kalimti pagdala ang kape
Ug ang sopas nga bag-ong hinaon
Atong kinaham nga sumsuman
Sa atong unyang paghinabi
Ikaw ug ako balikon ko

KANHI, KARON ug UGMA

Unsay angayan kong buhaton
Wala ko masayod unsaon paghikalimot
Sa tanan tang kagahapon

Unsay nasaypan
Wala koy nahinumdumang binuhatan
Gawas sa gibiyaan kong balak dili bakak

Dili pa ba diay igo
Nga kamatuoran lang ang ako
Walay rebeti, kolorite nga mahandom

Unsay naingnan sa pagbiya mo
Matuod ba nga siya na ang gahupot
Sa gugma mo nga kanhi ako

Kanhi, kanhiay ako
Nga imong damgo ug gugma
Karon siya na nga nahimo mong pahiyom

Ako ang KANHI
Siya ang KARON
Manghinaot lang ko
mga mahikalimtan ka UGMA.

Ang Mga Saksi

Saging, balanghoy, ginamos, buwad,
tinuwang higsiw ug ang utang bisaya
ang gisaw-an ta matag karon ug unya

Pag-uma, pagpangani
pagpanginhas sa hunasan matag hapon
unsa pamay atong pangayuon
gibuligan kita sa yuta ug sa langit

Silang tanan saksi
ginikanan, igsuon, silingan
ug ang atong mga anak
nga nahimong kabahin
sa atong matag-adlaw adlaw
nga pakig bisog sa mga unos

Silang tanan saksi
silang tanan nagpamatuod
silang tanan mibulig
sa atong gugmang gisaw-an
nga karon usa nalang ka balak
bakak.

Unsay Imo

Usbon ko,
wala nako magkinahanglan nimo
wala nako maghuwat sa imong pagtagad
mukayod kog ako

Kay ngano man ug mag-inusara?
kay ngano man diay ug mag-istoryang mao rang usa?

Unsay imo?
unsay labot mo'g ika-istorya ko
ang mga gihambin kong lawa lawa
sa akong panumduman

Sila nalang ang may katungod
sa pagsudya kanako
 dili nana imo

PASAYLO

kalakbit niadtong pangandoy
ang ikaw ug ako sa kahangturan

imo akong giubanan nga nagpatuo kanako
nga ako adunay ikaw

apan wala, walay ikaw uban kanako
diha sa gipanumpaan tang muhangtod

nakalimot ka ug nabaling ang imong mga mata
kaniya nga anaa sa kabatan-on;
katahom; pahiyom

manghinaot kong muhangtod
ang inyong kamalipayon

pasagdi akong mag-inusara
kalimtan ko ikaw sa akong mga damgo

ipaanod ko sa mga luha ang atong duha ka lagda
niadtong papeles sa atong kaminyuon

ug bitbiton ang duha ka matahom nga bunga;
hulog sa langit alang unta sa atong duha
ka naugdaw na nga gugma, gipasaylo na tika.