Unsay Imo

Usbon ko,
wala nako magkinahanglan nimo
wala nako maghuwat sa imong pagtagad
mukayod kog ako

Kay ngano man ug mag-inusara?
kay ngano man diay ug mag-istoryang mao rang usa?

Unsay imo?
unsay labot mo'g ika-istorya ko
ang mga gihambin kong lawa lawa
sa akong panumduman

Sila nalang ang may katungod
sa pagsudya kanako
 dili nana imo

PASAYLO

kalakbit niadtong pangandoy
ang ikaw ug ako sa kahangturan

imo akong giubanan nga nagpatuo kanako
nga ako adunay ikaw

apan wala, walay ikaw uban kanako
diha sa gipanumpaan tang muhangtod

nakalimot ka ug nabaling ang imong mga mata
kaniya nga anaa sa kabatan-on;
katahom; pahiyom

manghinaot kong muhangtod
ang inyong kamalipayon

pasagdi akong mag-inusara
kalimtan ko ikaw sa akong mga damgo

ipaanod ko sa mga luha ang atong duha ka lagda
niadtong papeles sa atong kaminyuon

ug bitbiton ang duha ka matahom nga bunga;
hulog sa langit alang unta sa atong duha
ka naugdaw na nga gugma, gipasaylo na tika.

Mabudhion

giugkat mo na usab
kadtong mga gilukot ko nang banig sa bakak
hanig sa imong kasalbahis--
mabudhion,

hagbay ko nang nalimtan
unsa pay angay nga balikan
gianod na kini sa nauga kong mga luha,
mabudhion.

gaduwa ka sa kalayo
nalimot kang atua ako sa ibabaw
galantaw ug naugdaw sa katugnaw,
baga ug mga nawong--
mga mabudhion

dili sa tanang higayon imo
timan-i nagtuyok pa ang panahon
ug wala koy planong muligid
sa mga tam-is mong pasalig--
mabudhion

lab-as pa sa akong panumduman
imo kong gikataw-an ug nibahakhak ka,
nakaminos sa akong puhaw nga sanina
nga nagtabon sa akong mga buktong namukog sa konsomisyon--
mabudhion

igo na ang libuang bakho
dili nako mabitik sa imong paon
kay hangtod karon nag-uylap pa sa kasakit
ang agi sa pana,
nga nitaroy sa akong dughan
mabudhion

Utot

taliwala sa akong paglitaniya
mipilaluyo ang dahunog sa sunata
sa imong lanog nga bahong hangin
daw gitik nga dili mapugngan
buhakhak sa akong kauban
walay kabutangan

Katumanan

Pagkaanindot palandungon,

Ikaw ug ako ilalom 

sa dakong punuan sa avocado;

Lantaw ang halapad nga wanang

sa uma nga tin-aw ang lunhaw

sa mga dahon sa mais;

Gapaling paling daw gawaltza

sa sunata sa hangin ug

gibayaw sa tumang kaanyag

sa kaudtuhong mapahiyumon.

Ikaw ug ako katong mga damgo kagahapon

nga natuman karon.

Aduna gyud diay katumanan ang tanan 

kung imong buligan.

Maabot man ang hapon 

dili ko kini igsapayan.

Ako malipayon.

Ang Balak

Ug nibalik ikaw sa akong panumduman
Ikaw kadtong akong balak sa kagahapon

Ang akong garay sa pulong nga dili mabasa
Ug dili madungog sa yanong mga dalunggan

Ikaw kadtong gitungtong sa intablado
Nga amag pa sa bulan sa kagabhion

Tinagubtob sa akong kasing kasing
Ang nag-inusarang sunata sa imong pagkiay

Pagkaanindot palandungon
Usa nalang ikaw karon kagahapon

Ang Banggiitang Wakwak

Pastilan ang wakwak

Mikatawa ug mihagakhak

Nagsadya sa nisalir niyang pamakak

Kang Inting nga atua namulak

Sa iyang giingong binulig na gugmang nangapulak

Ahak! 

Pangandoy nga Kahilom

Buntag na usab
humana ang akong paglaroy laroy
luyo sa kangitngit
diin ikaw mihagok lang
ug milingyew
taliwala sa akong pagkahipalasay

buntag na usab
apan kanus-a pa kaha mahuman
kanang imong pagyawyaw
gusto kong matulog
basin didto sa akong pagkatulog
akong mahibalag
ang kahilom

Haduol nga katapusan

nasinsiyo kana babaye
wala na ang kanhe mong katahom

ug nahanaw na
ang tibuok ug ang kamatinud-anon
sa imong mga pahiyom

kay bisan sa luyo sa imong mga mata
akong nakita ang nasinsiyo mong huna huna
diin nagtakuban sa imong hudyaka

matibuok kapa kaha
o paabuton ko nalang
ang katapusan sa imong pagkawala

 

Kausaban

Lahi kana karon
nahimo mo nang hikalimtan
ang kanhi kabahin
sa atong kagahapon.

Nahanaw naba ang kaluoy?
ang pagbati nga ako lang?
ang tingog nga nag-inusara
diha sa imong panumduman?

Gimingaw ako
bisan anaa ka lang sa akong tiilan

mahawiran ko pa kaha pag-usab
ang kanhi ikaw sa lunhaw nga balilil-an?